A investigación histórica adquiriu onte o protagonismo que merece durante o acto de entrega dos décimos premios de Historia Medieval de Galicia que convoca a editorial Toxosoutos. Na casa consistorial carnotana, os galardoados deste ano, Marcos Fernández, pola súa obra Servos e escravos altomedievais no noroeste da península Ibérica, e Andreia Catarina Magalhaes, polo traballo titulado Elementos de adorno altimediévicos em Portugal, aludiron á importancia dunha iniciativa que fai posible que os investigadores vexan publicadas as súas obras.
Neste sentido, Marcos Fernández, que recibiu o primeiro premio, manifestou que, no eido histórico, escasas son as ocasións nas que se pode ver editado o traballo.
Bo entendemento
Por la súa banda, Andreia Catarina Magalhaes referiuse o entendemento das comunidades galaica e portuguesa.
Coa tenente de alcalde carnotana, Marisol Piñeiro, como anfitrioa, e coa presenza dos rexedores de Muros, Domingos Dosil; Lousame, Santiago Freire; e Outes, Carlos López Crespo, o acto desenrolado en Carnota supuxo o remate do primeiro ciclo deste certame, segundo manifestou o coordinador de Toxosoutos, David González.
O representante da editorial agradeceu a colaboración dos concellos e manifestou que sen o seu esforzo sería imposible a organización do premio.
Tamén aproveitou González para avanzar aspectos relativos á vindeira edición, na que a vila de Noia será o lugar no que se efectúe o fallo.
Pola súa banda, a tenente de alcalde, Marisol Piñeiro, indicou que o esforzo, a colaboración e o diálogo entre os dirixentes da comarca fai posible a recuperación e a posta en valor do patrimonio local. Neste sentido, referiuse á importancia que isto ten no eido cultural e no da potenciación turística.
Calidade das obras
En representación do xurado tomou a palabra Pedro García Vidal, que non dubidou en enxalzar a calidade das obras que concorreron ao certame. Neste sentido, precisou que cada ano se constata un maior nivel histórico e literario dos traballos que se presentan e, ao mesmo tempo, increméntase o número de autores participantes.
Pedro García Vidal definiu o certame como unha inversión grande en cultura. Tamén dixo que se trata dunha iniciativa novedosa a nivel do Estado porque se trata do único certame no que se valoran os estudos da historia medieval.
Tampouco deixou pasar a oportunidade de destacar o mérito dos concellos en poñerse de acordo para facer unha inversión cultural deste calado. Sobre isto engadiu que este aspecto redundará de xeito moi positivo en diferentes eidos.
